Birkir Bjarnason átti mjög góðan leik gegn Rúmeníu síðasta fimmtudaag, þrátt fyrir að leikurinn hafi endað með tapi.
Hann var maður leiksins að mati Fótbolta.net. „Besti maður Íslands í leiknum. Barðist að venju mikið, vann boltann oft og mörgum sinnum og skilaði góðu dagsverki. Hefði samt átt að skora í þessum leik, alveg klárlega," sagði í einkunnagjöf frá leiknum.
Það var umræða fyrir verkefnið að hann væri ekki í góðu leikformi og þess háttar, þar sem hann er nýbúinn að skipta um félag - til Adana Demispor í Tyrklandi en hann leit mjög vel út í síðasta leik.
Margrét Lára Viðarsdóttir, fyrrum landsliðskona, var mjög hrifin af frammistöðu Birkis í síðasta leik.
„Jóhann Berg og Birkir Bjarna, mér fannst þeir stíga upp og standa sig mjög vel í leiknum. Þetta var einn besti leikur sem ég hef séð Birki spila lengi. Hann er greinilega í frábæru standi," sagði Margrét Lára á RÚV.
„Þetta hjálpar þessum nýju og ungu strákum sem eru að koma inn í liðið," bætti Margrét við en Birkir mun í dag spila sinn 100. landsleik.
Athugasemdir