Mason lagði flautuna á hilluna á síðasta ári og hefur verið hluti af VAR-teyminu síðan.

Hann gerði slæm mistök í leik Newcastle og Crystal Palace um helgina en hann tók af fullkomlega löglegt mark af heimamönnum.

Tyrek Mitchell skoraði sjálfsmark og hafði Michael Salisbury, aðaldómari leiksins, dæmt það gott og gilt. Mason bað hann hins vegar um að skoða þetta betur og var niðurstaðan að dæma markið af.

Joe Willock var dæmdur brotlegur fyrir að hafa lent á Vincent Guaita, markverði Palace, en þegar endursýning er skoðuð sést það mjög skýrt að Mitchell ýtti Willock á Guaita áður en hann fær síðan boltann í sig og í netið.

Mason mun ekki fá leik í úrvalsdeildinni um helgina og er því refsað fyrir þetta atvik.

Mörg umdeild atvik áttu sér stað í ensku úrvalsdeildinni í síðustu umferð og eru þau til skoðunar.