Öll mörk leiksins komu eftir misskelfileg varnarmistök og var Mourinho sérstaklega ósáttur með annað mark Arsenal, þegar Marcos Rojo gaf boltann á Alexandre Lacazette og tæklaði hann svo í eigið net.

„Við vorum búnir að ná stjórn á leiknum þegar við skoruðum annað mark Arsenal fyrir þá," sagði Mourinho að leikslokum.

„Við skoruðum fjögur mörk en gerðum 2-2 jafntefli! Eins og vanalega þá gerðum við mistök sem kostuðu okkur en ég er ánægður með baráttuandann.

„Strákarnir börðust eins og ljón og lögðu allt í sölurnar, en þegar boltinn barst á okkar vallarþriðjung þá fannst stressið í mönnum alla leið á bekkinn."

Mourinho er einnig ósáttur með nýtingu sinna manna í upphafi leikja og segist þurfa meiri tíma til að koma Rauðu djöflunum á hærri stall.

„Við fáum alltaf fyrsta marktækifæri leiksins en hversu oft skorum við úr því og byggjum á því? Það er mjög, mjög sjaldgæft.

„Baráttuandinn var Manchester United en það vantaði uppá gæðin. Það er ekki hægt að bera okkur saman við lið sem innihélt Roy Keane, Ruud van Nistelrooy og Nemanja Vidic. Við þurfum meiri tíma."