Slæm tíðindi voru að berast úr herbúðum Real Madrid. Karim Benzema og Gareth Bale eru búnir að bætast við meiðslalistann og missa því af úrslitakeppni spænska Ofurbikarsins sem fer fram í Jeddah í Sádí-Arabíu í vikunni.
Bale er með sýkingu í öndunarfærum og verður því frá í nokkra daga á meðan Benzema er meiddur á vinstri fótlegg. Meiðsli Benzema, sem hefur verið meðal bestu manna Real á tímabilinu, eru lítilvægleg. Eden Hazard og Marco Asensio eru einnig frá vegna meiðsla.
Þeir voru báðir með í 0-3 sigri gegn Getafe um helgina en munu missa af undanúrslitaleik Ofurbikarsins gegn Valencia á miðvikudaginn. Ólíklegt er að þeir muni taka þátt í úrslitaleiknum þó liðið komist þangað.
Úrslitaleikurinn fer fram næsta sunnudag. Þar gæti Real mætt erkifjendum sínum í Barcelona eða nágrönnunum í Atletico.
Athugasemdir
