Lærisveinar Heimis Hallgrímssonar í Al Arabi steinlágu er þeir fengu Al Sadd í heimsókn í efstu deild í Katar.

Aron Einar Gunnarsson var í byrjunarliðinu og komust heimamenn yfir snemma leiks með marki frá spænska miðverðinum Marc Muniesa, sem ólst upp hjá Barcelona og var hjá Stoke City í nokkur ár.

Ro Ro jafnaði á 31. mínútu og var Baghdad Bounedjah snöggur að koma gestunum yfir. Muniesa kom knettinum aftur í netið skömmu síðar nema að í þetta sinn var það í rangt mark. Staðan var því 1-3 í hálfleik fyrir Al Sadd, sem endaði í 6. sæti á HM félagsliða í desember.

Gestirnir bættu þremur mörkum við í síðari hálfleik og niðurstaðan 1-6 stórsigur.

Al Arabi er í fimmta sæti, með 18 stig eftir 12 umferðir. Al Sadd er þremur stigum fyrir ofan og með leik til góða.