Hlustaðu á þáttinn í spilaranum að neðan eða finndu hann á öllum helstu podcastveitum undir Fótbolti.net.

Í þættinum sem birtist í dag segir hann frá ferð sem hann fór í 16 ára gamall ásamt Gunnari Sigurðssyni og Daða Pálssyni þar sem þeir fengu að æfa hjá Glasgow Rangers í Skotlandi.

„Þá tíðkaðist það í kringum handbolta að milli leikja var farið í búningsklefa annarra liða og treyjum stolið. Ég fór heim með Breiðabliks og KA treyjur eftir turneringar. Þetta var trend," sagði Bjarnólfur í Miðjunni.

„Við fórum til Rangers og það gekk vel á fyrstu æfingunni og við áttum að vera í viku. Eftir æfinguna ákváðum við að halda þessum leiðinda ávana áfram og stálum allskonar æfingaklæðnaði og handklæðum og sokkum og allskonar drasli. Við héldum að það væri við lýði þar úti líka sem var alls ekki. Strákarnir klöguðu okkur og sögðu að það væri þjófalýður mættur frá Íslandi á Ibrox og væri að stela æfingagöllum," sagði hann.

Drengirnir bjuggu hjá David Moyes föður knattspyrnustjórans þekkta í Glasgow þar sem þeir gistu á meðan tímanum í Skotlandi stóð.

„Hann fær hringingu með þær fregnir að við værum að ræna og rupla á Ibrox. Ég hef aldrei séð fullorðinn mann eins vonsvikinn og hann var með okkur þegar hann segir okkur frá því að við séum ekki velkomnir þarna lengur," sagði Bjarnólfur.

„Hann var búinn að vinna sitt ævistarf í kringum félagið og þetta var mikill blettur fyrir hann kallgreyið. Flug til Glasgow var tvisvar í viku svo við þurftum því að bíða í 3-4 daga hjá honum eftir næsta flugi og fórum svo heim með skottið milli lappanna."