Eina mark leiksins kom í fyrri hálfleik þegar Andriy Yarmolenko varð fyrir því óláni að skalla fasta aukaspyrnu frá Gareth Bale í eigið net.
Úkraínumenn vildu fá vítaspyrnu skömmu eftir markið en ekkert var dæmt þegar Joe Allen sparkaði Yarmolenko niður innan vítateigs.
Úkraína var betra liðið í leiknum en tókst ekki að gera jöfnunarmark þar sem Wayne Hennessey varði níu skot.
Oleksandr Zinchenko, leikmaður Manchester City og Úkraínu, gaf kost á sér í viðtal að leikslokum.
„Hver einasti leikmaður lagði allt í sölurnar í dag. Við erum algjörlega uppgefnir. Við áttum ekki skilið að tapa þessum leik en svona getur gerst í fótbolta," sagði Zinchenko.
„Fótbolti snýst um tilfinningar og við getum gefið okkar stuðningsmönnum magnaðar tilfinningar en því miður þá náðum við ekki úrslitunum sem við vildum í dag."
Stríðið sem geisar í Úkraínu hefur ekki farið framhjá neinum og lauk Zinchenko viðtalinu á nokkrum orðum um það.
„Allir eiga rétt á að lifa í friði og við verðum að stöðva þetta stríð. Í dag er þetta Úkraína en hver veit hvaða land þetta verður á morgun? Við verðum að standa saman."