Argentína var rétt í þessu að tryggja sér bronsverðlaun í Suður-Ameríkubikarnum með góðum sigri gegn Síle.

Sergio Aguero og Paulo Dybala skoruðu bæði mörk Argentínu á fyrstu 22 mínútum leiksins en korteri síðar var Lionel Messi rekinn útaf eftir samskipti við Gary Medel.

Medel réðst að Messi sem stóð í lappirnar og dómari leiksins rak þá báða af velli, þó Messi hafi líklega ekki átt mikla sök í málinu. Þetta var annað rauða spjald ferilsins hjá Messi.

Arturo Vidal skoraði eina mark síðari hálfleiksins úr vítaspyrnu og lokatölur því 2-1 fyrir Argentínu. Sigurinn er verðskuldaður enda Argentínumenn talsvert hættulegri í dag.