Bayer Leverkusen og Sevilla eru komin áfram í 8-liða úrslit Evrópudeildarinnar. Sevilla vann Roma 2-0 í hreinum úrslitaleik en restin af úrslitakeppninni fer fram í Þýskalandi.
Leik Roma og Sevilla var aflýst vegna útbreiðslu kórónaveirunnar og ákvað UEFA því að liðin myndu mætast á hlutlausum velli og spila úrslitaleik um sæti í 8-liða úrslitum.
Liðin spiluðu því á heimavelli MSV Duisburg en Sevilla vann leikinn 2-0. Spænski vinstri bakvörðurinn Sergio Reguilon kom Sevilla yfir á 22. mínútu. Hann fékk boltann vinstra megin á vellinum og keyrði inn í teiginn áður en hann afgreiddi boltann í netið.
Youssef En-Nesyri bætti við öðru undir lok fyrri hálfleiks eftir sendingu frá Lucas Ocampos. Sevilla átti fjölmörg hættuleg færi en Ever Banega var afar öflugur og átti meðal annars skot í slá og þá átti hann einnig fyrirgjöf á Jules Kounde sem skallaði boltanum í slá í fyrri hálfleiknum.
Undir lok leiks fékk Gianluca Mancini að líta rauða spjaldið fyrir brot á Luuk de Jong. Lokatölur 2-0 fyrir Sevilla sem er komið í 8-liða úrslit.
Bayer Leverkusen vann Rangers 1-0. Moussa Diaby gerði eina mark leiksins en Leverkusen vann fyrri leikinn 3-1. Diaby gerði markið á 51. mínútu og fer Leverkusen samanlagt áfram 4-1.
Eins og áður hefur komið fram þá fer restin af úrslitakeppninni fram í Þýskalandi og ætti það að koma sér vel fyrir Leverkusen.
Úrslit og markaskorarar:
b>Sevilla 2 - 0 Roma
1-0 Sergio Reguilon ('22 )
2-0 Youssef En-Nesyri ('44 )
Rautt spjald: Gianluca Mancini, Roma ('90)
Bayer 1 - 0 Rangers
1-0 Moussa Diaby ('51 )
Athugasemdir