Þessi efnilegi miðjumaður er á mála hjá Ajax í Hollandi. Hann ræddi við Fótbolta.net fyrir æfingu U21 landsliðsins í Árbæ í dag.

„Mér fannst við spila frekar vel. Við náðum í sigur og það er það mikilvægasta," segir Kristian um leikinn við Hvíta-Rússland. Hann var sáttur með sína frammistöðu í leiknum.

„Þetta var mjög fínn leikur, að koma sér inn í liðið og maður spilaði fínt."

Hann segir að eldri bróðir sinn, Ágúst, hafi hjálpað sér að komast inn í hópinn. Þeir spiluðu saman í leiknum við Hvíta-Rússlandi en Ágúst kom inn á sem varamaður.

„Eldri bróðir minn er í liðinu og hann tekur mig undir sinn væng. Ég hafði aldrei spilað með honum en ég hef spilað á móti honum tvisvar sinnum. Það var mjög skemmtilegt að spila með honum, það er fínt 'chemistry' á milli okkar."

Kristian hefur verið að æfa með aðalliði Ajax. Þar er hann kallaður 'Kevin de Bruyne' eins og má lesa um hérna.

„Ég er kallaður Kevin í aðalliðinu. Ég átti að taka nýliðavígslu þar og segja nafnið mitt 'Kristian' og þá kom (Dusan) Tadic og sagði: 'Heitir hann ekki Kevin?' Það var mjög fyndið."

„Þetta tímabil ætla ég að reyna að vera í varaliðinu og gera vel þar," sagði Kristian en varalið Ajax spilar í B-deildinni í Hollandi.

Næsti leikur hjá U21 landsliðinu er gegn Grikklandi á morgun. „Við erum á góðum stað núna en þurfum að vinna næsta leik.," sagði Kristian.

Sjá einnig:
De Boer líkir Kristian Nökkva við De Bruyne