Ítalía og Spánn eigast við í undanúrslitum A-deildar Þjóðadeildarinnar á San Síró en það vakti mikla athygli er byrjunarlið Spánar var tilkynnt.

Þar var hinn 17 ára gamli Gavi en sá spilar hjá Barcelona. Þetta þykir eitt mesta efni Spánar og var honum treyst fyrir því að byrja á miðsvæðinu gegn Evrópumeisturum Ítalíu í kvöld.

Hann er nú yngsti leikmaðurinn til að byrja A-landsleik fyrir Spán eða 17 ára og 62 daga gamall.

Þeir Arnar Laufdal Arnarsson og Magnús Hólm Einarsson ræddu einmitt Gavi í hlaðvarpsþættinum Ungstirnin hér á Fótbolta.net en það er morgunljóst að þetta er framtíðarleikmaður og verður gaman að fylgjast með honum vaxa og dafna.