Darren Moore knattspyrnustjóri Sheffield Wednesday var augljóslega stoltur af lærisveinum sínum eftir 2-1 sigur gegn Newcastle í 64-liða úrslitum FA bikarsins.
Liðin mættust fyrr í kvöld og komust heimamenn í Sheffield í tveggja marka forystu áður en Bruno Guimaraes minnkaði muninn, en nær komust gestirnir frá Newcastle ekki.
Frábær sigur fyrir Sheffield sem er í toppbaráttu ensku C-deildarinnar sem stendur og er núna ósigrað í tíu leikjum í röð í öllum keppnum.
„Strákarnir spiluðu ótrúlega vel í dag. Þeir gáfu allt í þetta og núna verðum við að halda svona áfram. Þetta kvöld gefur okkur von og trú fyrir framhaldinu, við þurfum að leggja mikið á okkur - það er mikil vinna framundan," sagði Moore að leikslokum.
Afar óvænt úrslit en Newcastle, sem er í Meistaradeildarbaráttu í úrvalsdeildinni, mætti til leiks með nokkuð sterkt lið.