Mikill léttir eftir löng og erfið meiðsli
Kristófer talaði um tvær til þrjár vikur seint í október og það stóðst. Hans fyrsti leikur með Grenoble, sem leikur í næstefstu deild, kom þann 12. nóvember. Hvernig var tilfinningin að komast loksins inn á völlinn?

„Það var í rauninni mikill léttir að hafa fengið að koma inná eftir löng og erfið meiðsli sérstaklega vegna að ég var meiddur þegar að ég mætti út eða í raun frá því í lok mars 2019," sagði Kristófer við Fótbolta.net.

Meiðsli og hörð samkeppni settu strik í reikninginn
Kristófer kom næst við sögu um tveimur mánuðum seinna. Hvernig lítur hann til baka á þetta tímabil?

„Ég stefndi klárlega á að spila meira en ég gerði en það tók lengri tíma að komast inn í hlutina þar sem að framherjinn sem hafði verið að spila var búinn að vera besti leikmaður liðsins."

„Þegar komið var fram í nóvember þá vildi þjálfarinn bara spila með einn fremstan og hinn framherjinn sem var fenginn er reynslubolti og einn af ef ekki launahæsti leikmaður liðsins þannig að ég átti á brattan að sækja."

„Mér var tjáð í nóvember þegar ég kom inná í fyrsta skiptið að þeir vildu fara varlega með mig, frekar taka tíma en ekki þó svo að ég hafi gert mjög vel þegar ég loksins kom inná völlinn!"

„Þegar ég ákvað að fara í Grenoble þá var ég hugsaður sem annar tveggja framherja liðsins og voru öll plön samkvæmt því en meiðsli eru auðvitað ekki með í slíkum pælingum þó svo að meiðsli séu partur af þessu og ég hef svo sannarlega fengið minn skammt sl, árið."

Misstu of marga leiki niður í jafntefli
Grenoble endar í 9. sæti deildarinnar. Er það ásættanlegt?

„Stefnan fyrir þetta tímabil var að vera í topp fimm í deildinni þannig að þetta voru klárlega ákveðin vonbrigði en það hefði ekki breytt miklu þar sem að það var ekkert umspil í ár. Okkur vantaði að skora fleiri mörk á mikilvægum tímapunktum og misstum við of marga leiki niður í jafntefli."

„Skrýtnasta sem ég hef séð gerast í leik"
„Brice Maubleu, markvörður Grenoble í frönsku B-deildinni, komst í sögubækurnar þegar hann skoraði ævintýralegt sjálfsmark í gærkvöldi." segir í frétt Fótbolta.net þann 29. febrúar. Maubleu ætlaði þá að kasta knettinum frá marki en mistókst herfilega. Á einhvern undraverðan hátt kastaði hann knettinum í öfuga átt.

Hver voru viðbrögð liðsfélagana eftir mistök Maubleu?

„Menn voru ekki alveg að átta sig á þessu og ég held að flestir hafi misst af þessu þar sem þeir voru að horfa fram á við. Þetta er samt líklegast eitt það skrýtnasta sem ég hef séð gerast í leik…"

Lagði mikið á sig til að ná tökum á frönskunni
„Það er töluð mjög lítil enska í Frakklandi sem gerir það að verkum að það erfiðara fyrir erlenda leikmenn að komast inn í allt en að sama skapi þvingar það menn að komast inn í kúltúrinn."

„Þess vegna er ég að læra frönsku og ég mæti 2 sinnum í viku í frönskukennslu en tungumálið er töluvert erfiðara en hollenskan en þetta er allt að koma." sagði Kristófer við Fótbolta.net í október. Í febrúar var hann í löngu viðtali þar sem franskan var alls ekki slæm. Kom á óvart hvernig gekk að læra frönskuna?

„Ég myndi alls ekki segja að þetta kom mér mikið á óvart að mér hafi gengið vel að læra tungumálið þar sem ég hef sett mikinn tíma í að reyna að læra tungumálið og því að ég lagði mikið upp á það að læra frönsku þegar að ég kom út þar sem að fáir Frakkar geta talað ensku."

Greip um sig smá örvænting
Kristófer var mjög nálægt því að missa af flugi sínu frá London til Íslands þegar hann var á leið heim frá Frakklandi. Fréttaritari bað Kristófer að rifja upp atburðarásina og hvað hafði flogið í gegnum hausinn á honum.

„Á þeim tíma sem ég átti að fara í flugi frá London til Íslands þá var búið að aflýsa öllum flugum á öðrum stöðum þannig að ég hélt að þetta yrði seinasta flugið til Íslands í langan tíma."

„Það greip um mig smá örvænting þar sem að allir bílar neituðu og skutla mér 100 metra undir göngin sem koma manni að flugstöðinni og að það var 'boarding' eftir korter."

„Ég byrjaði að hlaupa á þrjár mismunandi stoppistöðvar til að skoða hvort að strætó færi á flugvöllinn þaðan og ég fann loksins strætó þegar að það voru 40 mínútur í að vélin myndi fara."

„Ég þurfti síðan að hlaupa út í enda flugvallarins til að komast í vélina. Ég held að allt í allt hafi þetta verið 11 km sem ég hljóp með tvær ferðatöskur og í þykkri úlpu."

Spenntur fyrir framhaldinu
Að lokum var Kristófer spurður hvernig hans staða væri í Frakklandi. Er möguleiki að hann fari annað á næstunni?

„Staðan mín er mjög fín. Félagið hefur mikla trú á mér og ég treysti verkefninu og er spenntur fyrir komandi árum."

„Ég tel nánast engar líkur á því að ég fari eitthvað annað núna þar sem að ég var byrjaður að vinna mig inn í liðið og á sama tíma ríkir mikil óvissa í fótboltaheiminum í dag," sagði Kristófer að lokum.

Sjá einnig:
Hin hliðin - Kristófer Kristinsson (Grenoble)