Hollenski dómarinn Björn Kuipers lagði flautuna á hilluna í ágúst eftir nítján ára feril en hann var í viðtali við RMC Sport um ferilinn og stærstu mistök hans sem dómari.
Kuipers er af mörgum talinn einn besti dómari 21. aldarinnar en hann dæmdi einmitt úrslitaleik Evrópumótsins í sumar áður en hann lauk ferlinum þann 7. ágúst er Ajax og PSV spiluðu um Johan Cruyff-skjöldinn.
Hann dæmdi reglulega í Meistaradeild Evrópu og meðal annars úrslitaleikinn árið 2014.
Kuipers ræddi við RMC Sport um ferilinn og stærstu mistökin á dómaraferli hans en það var 16-liða úrslitaleikur milli Chelsea og Paris Saint-Germain á Stamford Bridge í mars árið 2015.
Fyrri leikurinn endaði með 1-1 jafntefli. Í síðari leiknum rak Kuipers sænska framherjann Zlatan Ibrahimovic af velli fyrir tæklingu á Oscar en hann segir það hafa verið stærstu mistök ferilsins.
„Ég gaf Zlatan Ibrahimovic beint rautt eftir 31 mínútu. Þegar þú horfir á þetta á venjulegum hraða þá er þetta rautt en ef þú horfir á endursýningu af þessu þá er þetta aðeins gult spjald. Við brugðumst þarna sem dómaratríó," sagði Kuipers.
PSG komst áfram í 8-liða úrslit og fékk Zlatan eins leiks bann. Þar vann Barcelona með þremur mörkum gegn einu í fyrri leiknum og kláraði síðan dæmið 2-0 á Nou Camp. Tæklinguna má sjá hér fyrir neðan.
Athugasemdir