Þorsteinn Halldórsson sat fyrir svörum á fréttamannafundi í dag og ræddi um breytingarnar.

Áslaug er ekki með vegna höfuðmeiðsla en hún fékk höfuðhögg um tveimur vikum fyrir leikinn gegn Hollandi í september. Elín Metta er tæp fyrir komandi leiki en vonast er eftir því að hún geti spilað. Elín kemur inn í hópinn fyrir Hlín/Diljá.

„Áslaug Munda fékk höfuðhögg tveimur vikum fyrir síðasta verkefni og það var allt í góðum gír. Svo kom bakslag í það og hún var ekki spilfær í síðasta verkefni og er það ekki ennþá. Hún er ekkert farin að geta æft og ekki hægt að velja hana. Hafrún kemur inn fyrir Mundu sem vinstri bakvörður," sagði Steini.

„Ég ákvað að velja Berglindi í staðinn vegna þess að Berglind er að spila á fullu. Ég leit á það þannig að það myndi skipta okkur máli að leikmenn séu í þokkalegu spilformi. Andrea er í raun ekki búinn að spila neitt síðan hún var á Íslandi og ég tók þessa ákvörðun byggða á því."

„Ég tek Telmu inn fyrir Auði. Tema var frábær í gær og er búin að vera góð, er á fínum stað. Ég skipti um markmann þar. Svo kemur Elín Metta inn. Það er með þeim formerkjum að Elín Metta er smá meidd. Við vonumst eftir að hún verði klár en endanlega ákvörðun verður tekin með hana í lok næstu viku," sagði Steini.

Var eitthvað leyndarmál með meiðsli Mundu í síðasta verkefni?

„Það var ekkert leyndarmál. Ég þurfti aldrei að svara fyrir það og ég var ekkert að tjá mig um það þannig. Það var ekkert verið að leyna því, ekkert sérstök ákvörðun að það kom aldrei fram."

Fyrri leikur liðsins er gegn Tékklandi 22. október og sá seinni gegn Kýpur 26. október.