Arsenal er sagt hafa mikinn áhuga á helstu vonarstjörnu Ungverja, Dominik Szoboszlai.
Szoboszlai er tvítugur miðjumaður sem leikur með RB Salzburg í Austurríki.
Szoboszlai var orðaður við Arsenal síðasta sumar og núna segir ungverski fjölmiðillinn Index að Mikel Arteta vilji fá miðjumanninn í janúar. Index hefur það eftir umboðsmanni leikmannsins að Arsenal sé áhugasamt.
Szoboszlai hefur spilað 73 leiki fyrir Salzburg og skorað í þeim 22 mörk. Umboðsmaður hans sagði jafnframt að leikmaðurinn myndi líka það vel að vera áfram í þýskumælandi landi.
Salzburg og þýska úrvalsdeildarfélagið RB Leipzig eru systrafélög og hafa nokkrir góðir leikmenn farið þar á milli síðustu ár.
Szoboszlai hefur spilað tíu A-landsleiki fyrir Ungverjaland og hann er í hópnum sem mætir Íslandi í úrslitaleik um sæti á EM í næstu viku.
Rúnar Alex Rúnarsson, landsliðsmarkvörður Íslands, er á mála hjá Arsenal.
Athugasemdir