Gylfi var í byrjunarliði Everton en var tekinn af velli eftir 66 mínútur fyrir Alex Iwobi.

Það er venja fyrir því að þegar Everton spilar illa að þá fær Gylfi að heyra það hvað mest af öllum frá stuðningsmönnum Everton. Þannig hefur það verið nánast alveg frá því hann var keyptur frá Swansea fyrir 45 milljónir punda sumarið 2017.

Gylfi fékk mikið að heyra það í dag á samfélagsmiðlum. Meðal þeirra harðorðustu var plötusnúður að nafni Anton Powers sem er stuðningsmaður Everton. Powers er nokkuð vinsæll í sínu fagi og er hann með tæplega milljón hlustendur mánaðarlega á tónlistarstreymisveitunni Spotify.

Hann skrifaði á Twitter: „Kaupin á Sigurðsson eru þau verstu í sögu Everton. Ég skammast mín fyrir að hann hafi fengið að bera fyrirliðabandið. Býður ekki upp á neitt."

Powers hefur núna eytt tísti sínu en mynd af því má sjá hér að neðan.

Næst á dagskrá hjá Gylfa er leikur með íslenska landsliðinu gegn Ungverjalandi í úrslitaleik um sæti á EM í næstu viku.