Tomas Soucek gerði eina mark leiksins á 91. mínútu og vildu leikmenn Fulham fá dæmda rangstöðu vegna þess að Sebastien Haller var fyrir innan þegar sendingin fór af stað. Haller reyndi þó ekki að leika boltanum en virtist samt sem áður hafa áhrif á varnarmenn Fulham, sem hreinsuðu beint út í teig á Said Benrahma, sem lagði sigurmarkið upp fyrir Soucek.

Moyes var spurður út í markið að leikslokum og viðurkenndi að hann væri sammála Fulham, hann hefði viljað fá dæmda rangstöðu ef hann væri á hinum bekknum.

„Ég er ekki sannfærður að þetta hafi verið löglegt mark, á öðrum degi hefði verið flautað á rangstöðu. Mér finnst rangstöðureglan sú erfiðasta í fótboltanum í dag," sagði Moyes.

„Þetta eru frábær þrjú stig og við erum ánægðir með þau en núna þurfum við að bretta upp ermarnar ef við ætlum að ná einhverjum árangri."