Sænskir fjölmiðlar greina frá því að sænsku meistararnir í Malmö séu að skoða miðjumanninn Rúnar Má Sigurjónsson, leikmann Grasshopper í Sviss.
Svissneski fjölmiðillinn Blick sagði á dögunum að framtíð Rúnars hjá Grasshopper væri í óvissu. Þessi 27 ára miðjumaður hefur ekki átt fast sæti í liðinu og haft var eftir þjálfara hans að hann myndi ekki vilja sitja endalaust á bekknum.
Rúnar Márgæti hugsað út í að skipta um lið til að auka möguleika sína á því að vera í HM-hópi Íslands sem fer til Rússlands.
„Ég held að allir séu að hugsa um Rússland, á hverjum einasta degi er maður fókuseraður á Rússland næsta sumar. Maður þarf bara að standa sig með félagsliði sínu og grípa tækifærið þegar maður er með landsliðinu," sagði Rúnar við Fótbolta.net nýlega.
Í dag skrifaði Arnór Ingvi Traustason undir samning hjá Malmö og Rúnar Már gæti farið þangað líka ef eitthvað er að marka sænska fjölmiðla.
Athugasemdir