Real Madrid vann góðan sigur á Valencia í kvöld en liðið kom í leikinn með tap á bakinu úr síðasta deildarleik gegn Getafe.

Karim Benzema kom Real yfir með marki úr vítaspyrnu undir lok fyrri hálfleiks. Negldi boltanum í þaknetið, óverjandi. Þetta var mark númer 300 hjá Benzema fyrir Real Madrid.

Snemma í síðari hálfleik var staðan orðin 2-0. Vinicius Jr skoraði markið eftir skemmtilegt samspil við Benzema.

Stuttu síðar skoraði Vinicius sitt annað mark og þriðja mark Real. Hann skallaði boltann í opið markið eftir að Cillesen markvörður Valencia reyndi að kýla skot Asensio frá.

Þegar skammt var eftir af leiknum fékk Valencia vítaspyrnu. Goncalo Guedes fór á punktinn en Courtois varði frá honum, það fór þó ekki betur en að Guedes náði að skalla boltann síðan í netið.

Benzema kláraði síðan leikinn fyrir Real með öðru marki sínu og fjórða marki liðsins.