Southampton hefur tekið ákvörðun um að lána argentíska sóknarmanninn Guido Carrillo til Leganes á Spáni út næsta leiktímabil.
Hinn 27 ára gamli Carrillo hittir þar knattspyrnustjórann sem fékk hann til Southampton, Mauricio Pellegrino.
Pellegrino tók við Leganes í síðasta mánuði, en Leganes endaði í 17. sæti La Liga á síðustu leiktíð.
Carrillo kom til Southampton frá Mónakó í janúar fyrir 19 milljónir punda og er hann sagður vera dýrasti leikmaður í sögu Southampton. Hann fann ekki taktinn í ensku úrvalsdeildinni og hefur hann því verið lánaður.
Carrillo kom við sögu í 10 leikjum fyrir Southampton en skoraði ekki eitt mark.
Hann vonast eflaust til þess að það gangi betur á Spáni.
Athugasemdir