Íslendingaliðið Sandefjord er í vondum málum eftir enn eitt tapið. Emil Pálsson spilaði allan leikinn en Ingvar Jónsson sat allan leikinn á bekknum eins og svo oft áður á þessu tímabili.

Sandefjord komst þó í 2-0 í fyrri hálfleik gegn Haugesund. Með tveimur mörkum á þriggja mínútna kafla eftir um 20 mínútna leik í seinni hálfleik jöfnuðu Haugesund leikinn.

Staðan var 2-2 allt fram í uppbótartíma en þá skoraði Haugesund tvö mörk til viðbótar og Sandefjord situr sem fastast á botninum með sex stig eftir 16 leiki og eru átta stigum á eftir næsta liði.

Næsta lið er Start en með því liði leika Aron Sigurðarson og Kristján Flóki Finnbogason. Start lenti undir í byrjun seinni hálfleiks gegn Stabæk sem er einu sæti ofar.

Start gafst ekki upp og voru komnir í 2-1 þrettán mínútum síðar. Ekki var meira skorað og mikilvægur sigur staðreynd. Start er enn í næst neðsta sæti en er nú jafnt næstu tveimur liðum að stigum.

Aron spilaði næstum því allan leikinn, var tekinn útaf í uppbótartíma, en Kristján Flóki sat allan tímann á bekknum.