Spænski þjálfarinn Javi Gracia er án starfs eftir að Watford lét hann taka poka sinn í gær en Quique Flores Sanchez tók við keflinu af honum.
Gracia tók við Watford árið 2018 en á síðasta tímabili kom hann liðinu í úrslitaleik FA-bikarsins og endaði þá liðið í 11. sæti deildarinnar.
Liðið hefur ekki unnið leik í fyrstu fjórum umferð ensku úrvalsdeildarinnar og er með eitt stig á botninum en eigendur Watford ákváðu að slíta samstarfinu í gær.
Gracia var rekinn og Flores Sanchez fenginn inn í staðinn en hann stýrði liðinu tímabilið 2015-2016. Fréttirnar komu Gracia á óvart.
„Eftir óvænta tilkynningu um að samningnum mínum hafi verið rift þá verð ég að segja að ég er hissa yfir þessari ákvörðun eftir að hafa náð sögulegum árangri fyrir Watford á síðustu leiktíð," sagði Gracia í yfirlýsingu sinni.
„Ég virði þó ákvörðunina og vil koma því á framfæri að ég á í góðu sambandi við eigendur Watford og það breytist ekki þó svo ég hafi verið látinn fara," sagði hann í lokin.
Athugasemdir