Baráttan í Pepsi Max-deildinn harðnar en Valur vann ÍBV með fjórum mörkum gegn engu í dag. Hlín Eiríksdóttir kom Val yfir eftir hálftímaleik og Margrét Lára Viðarsdóttir tvöfaldaði forystuna aðeins þremur mínútum síðar.

Elín Metta Jensen gerði þriðja markið áður en flautað var til loka fyrri hálfleiks en Hallbera Guðný Gísladóttir lagði upp markið, önnur stoðsending hennar í leiknum.

Margrét Lára gerði síðan út um leikinn í upphafi síðari hálfleik með góðum skalla eftir sendingu frá Dóru Maríu. Lokatölur 4-0 og Valur á toppnum með 46 stig, tveimur meira en Breiðablik en liðin mætast einmitt í hreinum úrslitaleik um deildina eftir viku.

Elín Metta og Hlín eru báðar með 16 mörk og eru markahæstar í deildinni en Margrét Lára fylgir fast á eftir með 14 mörk.

Stjarnan vann Keflavík 4-1. Maired Clare Fulton kom Keflavík yfir á 30. mínútu en í þeim síðari tók Stjarnan við sér og skoraði fjögur mörk. Aníta Ýr Þorvaldsdóttir jafnaði metin áður en Hildigunnur Ýr Benediktsdóttir gerði tvö mörk og Jasmín Erla Ingadóttir skoraði svo úr víti undir lokin og 4-1 sigur Stjörnunnar staðreynd.

Á sama tíma vann Selfoss 1-0 sigur á Fylki. Hólmfríður Magnúsdóttir gerði eina markið á 3. mínútu. Selfoss í 3. sæti deildairnnar með 28 stig, fjórum stigum á undan Þór/KA sem spilar við KR á eftir.

Úrslit og markaskorarar:

Valur 4 - 0 ÍBV
1-0 Hlín Eiríksdóttir ('30 )
2-0 Margrét Lára Viðarsdóttir ('33 )
3-0 Elín Metta Jensen ('44 )
4-0 Margrét Lára Viðarsdóttir ('48 )

Stjarnan 4 - 1 Keflavík
0-1 Maired Clare Fulton ('30 )
1-1 Aníta Ýr Þorvaldsdóttir ('54 )
2-1 Hildigunnur Ýr Benediktsdóttir ('69 )
3-1 Hildigunnur Ýr Benediktsdóttir ('81 )
4-1 Jasmín Erla Ingadóttir ('90, víti )

Selfoss 1 - 0 Fylkir
1-0 Hólmfríður Magnúsdóttir ('3 )