Arnar Þór Viðarsson var spurður út í ástæðuna fyrir skiptungunum í hálfleik í leik Íslands og Armeníu í kvöld. Ísak Bergmann Jóhannesson og Daníel Leó Grétarsson komu inn á fyrir Viðar Örn Kjartansson og Brynjar Inga Bjarnason.
Lestu um leikinn: Ísland 1 - 1 Armenía
Ánægðir með Daníel
Var annar þeirra meiddur?
„Brynjar var meiddur. Við vildum ekki taka neina sénsa. Hann var tæpur og við vildum nýta gluggann fyrir skiptingar í hálfleik í staðinn fyrir að skipta honum út af eftir fimm mínútur í síðari hálfleik."
„Daníel Leó kom mjög vel inn í leikinn. Við erum mjög ánægðir fyrir hans hönd. Þetta er í fyrsta skipti sem hann er hérna með okkur og hann hefur ekki verið að spila mikið. Við unnum fleiri einvígi og seinni bolta í síðari hálfleik, komum okkur í betri stöður til þess að vinna þessa bolta,“ sagði Arnar.
Albert í sömu stöðu og hjá AZ
„Við vildum fá Albert meira centralt, vera aðeins meira í boltanum. Þegar hann var í boltanum í fyrri hálfleik þá fannst okkur hann vera hættulegur. Það var ástæðan fyrir skiptingunum í hálfleik."
Ertu kominn nær því að sjá hvar Albert hentar liðinu best?
„Í fyrri hálfleik hafði hann mikið frjálsræði og var mikið í 'tíu' svæðinu og hann er í rauninni að spila nákvæmlega þessa stöðu hjá AZ. Það var ætlunin að fá hann og Viðar saman í þessum svæðum. Þegar Albert er einn upp á topp þá vantar oft stuðninginn í kringum hann. Við þurfum að laga þessar tengingar milli manna. Þetta er akkúrat það sem við erum að leita eftir; hvað verður best og hvernig verðum við að spila eftir nokkra mánuði."
Fréttaritari var forvitinn hvers vegna Daníel Leó kom inn á en ekki Ari Leifsson, Ari var í upprunalega hópnum en Daníel var kallaður inn vegna meiðsla Jóns Guðna. Er það af því Daníel er örvfættur eða stóð hann sig betur á æfingum í vikunni?
„Nei, það er voðalega erfitt að spila sig inn í liðið á æfingum fyrir landsleik. Þetta er nánast taktík allan tímann og hundleiðinlegar æfingar. Daníel var valinn í hópinn sem vinstri hafsent. Ég veit að Ari getur spilað bæði hægri og vinstri, við tókum bara þá ákvörðun að það væri betra að vera með örvfættan miðvörð í seinni hálfleik heldur en Ara. Ég þekki Ara mjög vel, hann hefði líka gert þetta upp á tíu."
Andrarnir ættu að geta spilað en óvíst með Brynjar
Hvernig er staðan á Andra Lucasi, Andra Fannari og Brynjari Inga? Geta þeir spilað á mánudag?
„Við tókum þá ákvörðun strax á þriðjudag að Andrarnir myndu ekki spila í dag. Þeir ættu báðir að vera klárir á mánudaginn."
„Brynjar Ingi fékk eitthvað í náranum. Ég veit ekki hvernig það verður en ég held það verði í lagi," sagði Arnar.
Athugasemdir