Adebayo Akinfenwa, sem er þekktur fyrir að vera sterkasti fótboltamaður í heimi, er að leggja skóna á hilluna eftir 20 ára feril.
Akinfenwa, sem heldur uppá fertugsafmæli á morgun, á aðeins eftir að spila einn leik á ferlinum - úrslitaleik á Wembley. Þar spila Wycombe Wanderers úrslitaleik við Sunderland um sæti í Championship deildinni á næstu leiktíð.
Þrátt fyrir líkamsburði sem henta vanalega ekki fótboltamönnum hefur Akinfenwa átt farsælan feril í neðri deildum Englands en aðeins spilað eitt tímabil í Championship, þegar Wycombe féll beint niður eftir að hafa farið upp tímabili áður, 2019-20.
Akinfenwa er kominn með fimm mörk og tvær stoðsendingar í 35 deildarleikjum fyrir Wycombe á tímabilinu þar sem hann spilar sjaldan meira en tíu mínútur í sama leiknum.
Hann fékk aðeins að spila 8 mínútur í undanúrslitum umspilsins þar sem Wycombe hafði betur gegn MK Dons. Akinfenwa fór í viðtal að leikslokum þar sem hann var spurður hvort þetta væri ekki besta afmælisgjöfin.
„Þetta er ótrúlegt, ég verð fertugur á Wembley. Síðasti leikurinn minn verður á Wembley," sagði Akinfenwa eftir að Wycombe tryggði sér sæti í úrslitaleiknum.
Úrslitaleikurinn gegn Sunderland fer fram á Wembley þann 21. maí.
