„Já klárlega, við vörðumst betur sem lið og það fór meiri orka í þetta og betri vinnusemi. Sárt að tapa 2-0 því mér fannst við vera inn í leiknum allan leikinn og með smá heppni hefði eitthvað getað komið en heilt yfir verðum við að horfa í að við erum ekki að skapa nóg.“ Sagði Jóhannes Karl Sigursteinsson þjálfari KR eftir 2-0 tap hans liðs gegn ÍBV um leik sinna kvenna og hvort hann hefði séð framfarir á leik liðsins.
Lestu um leikinn: KR 0 - 2 ÍBV
KR liðið náði oft á tíðum að vinna sig í ágætar stöður á vellinum en ákvarðanataka á síðasta þriðjungi reyndist þeim dýrkeypt oft á tiðum.
„Já það er rétt. Við erum að skapa okkur einn á einn stöður og það eru stöður sem þú þarft að vinna. Ég held að meira að segja í lokin höfum við náð að búa til einn á einn stöðu inn í teig. Þær sóknir þurfum við að klára með skoti eða hreinlega koma okkur í betri stöður. Það er oft þannig þegar þú tapar fótboltaleikjum að þú tekur litla trú með þér áfram og mér fannst aðeins vanta upp á það hreinlega að hafa trú á því að skora mörk.“
KR hefur tapað fyrstu þremur leikjum sínum í deildinni en það er engan bilbug að finna á Jóhannesi eða liðinu sem telja sig geta snúið gengi liðsins við.
„Klárlega. Þetta er langt mót og það er fullt af leikjum eftir og það er stígandi. Við erum að vinna fram á veginn og það er alltaf bara jákvætt. Við eigum Breiðablik og Val í næstu tveimur og það eru bara leikir sem við þurfum að stíga upp í og vera klárar í og bæta okkar leik.“
Sagði Jóhannes en allt viðtalið má sjá hér að ofan.
Athugasemdir