Foster Gillett, sonur George Gillett fyrrum eiganda Liverpool, er að verða meirihlutaeigandi í franska knattspyrnufélaginu Olympique Lyonnais samkvæmt frétt L'Equipe.
George Gillett er þekktur fyrir að hafa rekið Liverpool hrikalega illa á tíma sínum þar og sat sonur hans Foster í stjórn félagsins. Gillett var meirihlutaeigandi Liverpool í rúmlega þrjú ár áður en hann missti félagið endanlega frá sér í október 2010.
Foster reyndi að kaupa nokkur önnur félög í Evrópu og Frakklandi áður en Lyon samþykkti tilboðið. Jean-Michel Aulas, núverandi eigandi og forseti Lyon, situr áfram í stjórn félagsins í nokkur ár eftir eigendaskiptin.
Foster er að bjóða 600 milljónir evra fyrir Lyon og er tilbúinn til að setja 100 milljónir í leikmannakaup í sumar. Hann á ekkert félag fyrir og hefur mikinn metnað, hann vill gera góða hluti í fótboltaheiminum.
Það breytir ekki fortíðinni og öllu því sem fór úrskeiðis þegar hann sat í stjórn Liverpool ásamt föður sínum.
