Jökull Andrésson markvörður Reading spjallaði við Sæbjörn Steinke ásamt bróður sínum Axel Óskari leikmanni Örebro í Svíþjóð.
Tímabilið hjá Reading var ekki nægilega gott en Paul Ince tók við liðinu um miðjan febrúar mánuð. Jökull var á láni hjá Morecambe fyrri hluta tímabilsins en var kallaður til baka til Reading í janúar.
„Þeir fengu nýjan þjálfara, Paul Ince, alvöru gamli skólinn. Hann drullaði yfir mig á fyrstu æfingunni, ég var pínu lítill í mér ný kominn úr meiðslum."
Aðspurður hvort gagnrýnin hafi átt rétt á sér sagði hann;
„Ég var ekki frábær, ég ætla ekki að ljúga því," sagði Jökull.
„Kölluðu þig smjörfingur," skaut Axel inn í.
„Ég var nýkominn úr sex vikna meiðslum. Við vorum að spila, fimm á fimm, það lak einn inn hjá mér. Það segir enginn neitt og við byrjum að spila aftur, svo kemur þjálfarinn og segir; Ætlar enginn að drulla yfir hann hvað hann er ömurlegur? Ég var bara; Takk, ég var að reyna sýna mig á fyrstu æfingunni, það gekk ekki."
Jökull er spenntur fyrir næsta tímabili undir stjórn Ince. Reading endaði í 21. sæti, fjórum stigum frá falli í Championship deildinni á síðustu leiktíð.
„Hann er spes, hann er með sínar eigin hugmyndir. Ef maður vinnur með honum þá er þetta rosalega gott. Ég er mjög spenntur að sjá hvernig þetta verður á næsta tímabili."
