Lestu um leikinn: San Marínó 0 -  1 Ísland

Fyrri hálfleikurinn var ekki sérstakur hjá íslenska liðinu eins og talað var um á Viaplay í hálfleik.

„Þetta er ekki búið að vera gott. San Marínó, þegar þeir komast í einhvern séns á að sækja þá virðast þeir bara hætta við, gefa til baka á hafsent sem lúðrar honum út af. Það er engin pressa á okkur en við erum ekki að skapa nægilega mikið af færum," sagði Kári Árnason, fyrrum landsliðsmaður.

Er erfitt fyrir leikmennina að gíra sig upp í svona leik?

„Það er eitthvað sem er ekki alveg að stemma þarna. Það er landsleikur og menn verða að gíra sig upp í hvaða landsleik sem er. Við hljótum að geta ætlast til þess. En það er eitthvað einbeitingarleysi og það er pláss fyrir bætingu," sagði Rúrik Gíslason, annar fyrrum landsliðsmaður.

Það eru leikmenn að spila hjá Íslandi sem eiga ekki marga landsleiki að baki, þetta eru leikmenn sem ættu að vilja að sanna sig.

„Ég held að meðal leikjafjöldi sé aldrei yfir tíu á þeim leikmönnum sem eru að spila þarna. Ef þeir geta ekki gírað sig upp í þennan landsleik, þá geta þeir sleppt því að spila. Sérstaklega ef þú þarft að sanna eitthvað... þetta er ekki til útflutnings," sagði Kári.