Jose Mourinho, stjóra AS Roma, líður vel í dag og horfir á sjálfan sig sem meiri þjálfara í dag en fyrir 10 eða 20 árum síðan.
Mourinho segir sjálfur frá þessu en hans þjálfaraferill hefur verið á töluverðri niðurleið síðustu ár eftir mögulega misheppnaða dvöl hjá bæði Manchester United og Tottenham.
Mourinho var ráðinn stjóri Roma fyrir þessa leiktíð en liðið hefur náð í 15 stig úr sjö leikjum í Serie A á tímabilinu.
Að sögn Mourinho þá er hann enn með mikinn metnað og stefnir á að bæta sig á hverjum einasta degi í sínu starfi.
„Mér líður meira eins og þjálfara í dag en fyrir 10 eða 20 árum,” sagði Mourinho í samtali við Esquire.
„Ef þjálfari bætir sig ekki þá hefur hann misst alla ástríðu og það hugarfar sem hjálpar honum að bæta sig á hverjum einasta degi.”
„Þetta er ekki starf sem tengist líkamlegri getu, þetta er andstæðan við leikmann. Reynslan gerir þig aðeins betri, ég hugsa alltaf um næsta leik.”
Athugasemdir