Freysteinn Ingi Guðnason, leikmaður Njarðvíkur, var í síðustu viku á reynslu hjá þýska félaginu Köln þar sem hann æfði bæði með U19 og U21 árs liði félagsins.
Freysteinn er 17 ára gamall leikmaður sem spilaði 19 leiki og skoraði 1 mark með Njarðvík í Lengjudeildinni í sumar.
Þá hefur hann verið fastamaður í yngri landsliðum Íslands en hann á 12 landsleiki og eitt mark.
Þessi efnilegi leikmaður fór í annað sinn á reynslu til Köln á þessu ári, en síðastliðið vor dvaldi hann hjá liðinu í viku.
Köln má ekki kaupa leikmenn á þessu ári þar sem félagið er í félagaskiptabanni en því lýkur 1. janúar og verður þá félaginu frjálst að semja við nýja leikmenn.
Freysteinn er yngsti leikmaður í sögu Njarðvíkur en fyrir tveimur árum bætti hann met Óskars Arnar Haukssonar frá síðustu öld er hann kom inn af bekknum aðeins 14 ára og ellefu mánaða gamall í 6-0 sigri á Ægi.
Athugasemdir
