Liðið er án þjálfara, án heimavallar og samkvæmt upplýsingum Fótbolta.net hefur liðið ekki hafið æfingar. Félög í deildinni þurfa að skila inn upplýsingum fyrir leyfiskerfi KSÍ eigi síðar en 15. janúar.

Davíð Smári Lamude, sem hefur þjálfað Kórdrengi frá stofnun félagsins, hætti eftir síðustu leiktíð til þess að taka við Vestra. Davíð var gríðarlega mikilvægur fyrir félagið en lítið sem ekkert hefur heyrst af því hver muni taka við starfi hans, eða hvort einhver muni taka við hans starfi.

Í reglugerð KSÍ segir að þáttökutilkynningar í landsmótum skulu berast skrifstofu KSÍ á sérstökum eyðublöðum fyrir 10. janúar en félög áttu að staðfesta þátttöku sína með formlegum hætti í nóvember á síðasta ári. Félög þurfa þá að skila inn upplýsingum fyrir leyfiskerfi KSÍ eigi síðar en 15. janúar.

Einnig segir í reglugerðinni: „Þátttökutilkynningar verða ekki teknar til greina nema nauðsynlegar upplýsingar fylgi skv. reglugerðum KSÍ og fyrirmælum mótanefndar, sem og helmingur þátttökugjalda, helmingur heildargjalds vegna ferða- og uppihaldskostnaðar dómara- og aðstoðardómara vegna leikja í deildakeppni (ef við á) og ógreiddar skuldir fyrra árs. Eftirstöðvar þessara gjalda skal inna af hendi eigi síðar en 30. apríl sama ár ella hefur þátttökutilkynningin ekki verið staðfest."

Mörg félög sem eiga eftir að skila þátttökutilkynningum
Undirritaður heyrði í Birki Sveinssyni, mótastjóra KSÍ, í dag og spurði hann út í stöðuna. Hann vildi ekki tjá sig um einstaka félög en segir samt sem áður en margar tilkynningar vanti enn.

„Ég bíð eftir því að sjá hvaða lið tilkynna þátttöku í mótinu. Það eru mörg félög sem hafa ekki tilkynnt þátttöku enn þá," segir Birkir í samtali við Fótbolta.net.

Hvað gerist ef þátttökutilkynningar berast ekki fyrir miðnætti í kvöld?

„Þetta eru félög í öllum deildum. Við förum í það núna í dag og á morgun að hringja í félög, gá hvort þau hafi gleymt sér. Við biðjum þau að senda inn tilkynninguna, við reynum að láta svona formsatriði ekki stjórna því hvort lið verði með eða ekki... við erum mannleg hérna."

Sjá einnig:
Skrítið að vera í limbói - „Höfum gefið okkur meiri tíma í það"
Féllu en gætu samt haldið sæti sínu - Hvað segir KV um stöðuna?