Aron Einar Gunnarsson, landsliðsfyrirliði, spilar lykilhlutverk fyrir Al Arabi í Katar.
Al Arabi er mikið Íslendingafélag. Aron Einar er á miðjunni og á hliðarlínunni er Heimir Hallgrímsson með tvo íslenska aðstoðarþjálfara, þá Bjarka Má Ólafsson og Frey Alexandersson.
Al Arabi er mikið Íslendingafélag. Aron Einar er á miðjunni og á hliðarlínunni er Heimir Hallgrímsson með tvo íslenska aðstoðarþjálfara, þá Bjarka Má Ólafsson og Frey Alexandersson.
Freyr var nýverið í viðtali við 433.is þar sem hann fór yfir það þegar hann stýri Al Arabi gegn Al Sadd á dögunum. Heimir gat ekki stýrt liðinu þar sem hann var með kórónuveiruna.
„Það var hrikalega svekkjandi. Það var þvílíkur aulaskapur að kasta því frá sér, við vorum yfir þegar 89 mínútur voru á klukkunni," sagði Freyr en Al Sadd, sem leikur undir stjórn spænsku goðsagnarinnar Xavi, skoraði tvö mörk síðustu andartökum leiksins.
Freyr segir að Aron sé rosalega mikilvægur en hann gat ekki tekið þátt í þeim leik.
„Ég get alveg sagt það við íslenskan fjölmiðil að ef Aron Einar Gunnarsson hefði verið inn á vellinum, þá hefðum við lokað þessum leik. Hann festist í hálsinum í upphitun. Hann er samt alltaf með sinn eigin kodda á hótelinu. Ég veit ekki hvað gerðist hjá kallinum," sagði Freyr.
„Aron er hrikalega mikilvægur fyrir okkur, hann er í þrusu standi og er að spila gríðarlega vel. Við finnum mjög mikið fyrir því þegar hann er ekki með."
Þetta er gott að heyra fyrir landsleikina sem eru síðar í þessu mánuði. Það eru fyrstu leikir Íslands í undankeppni HM.
Leikir Íslands í mánuðinum:
Þýskaland - Ísland (fimmtudagur 25. mars)
Armenía - Ísland (sunnudagur 28. mars)
Liechtenstein - Ísland (miðvikudagur 31. mars)
Athugasemdir