Aidoo og félagar hans settu á laggirnar útfararfyrirtæki sem sérhæfir sig í að dansa með líkkistur fólks og þjóna gestum í útförum. Fyrirtækið var sett á laggirnar árið 2007 en það er nú orðið heimsfrægt eftir að myndband af gjörningnum birtist á samfélagsmiðlum.

Þar sjást þeir bera líkkistur og þá er lagið Astronomia undir í myndbandinu en það hefur verið notað við mörg tilefni upp á síðkastið.

Aidoo er mikill stuðningsmaður Barcelona og Chelsea og var hann spurður út í það hvaða fótboltamann hann væri til í að bera til grafar í framtíðinni og þar var Ronaldinho efstur á lista en Diego Maradona og Lionel Messi fylgja fast á eftir.

„Ég óska þeim auðvitað langlífis en ef ég fengi tækifærið þá er draumurinn að bera Ronaldinho til grafar. Maradona og Messi eru auðvitað á listanum líka en Ronaldinho er leikmaður sem hefur alltaf hrifið mig," sagði Aidoo við Footmercato.

„Dansinn minn væri tileinkaður honum því hann var mikill dansari á vellinum," sagði Aidoo.

Hér fyrir neðan má sjá myndbandið fræga.