Lionel Messi, einn besti fótboltamaður sögunnar, er orðinn sendiherra fyrir ferðamannaiðnaðinn í Sádi-Arabíu. Þetta var tilkynnt í dag en í kjölfarið birti Messi auglýsingu á Instagram þar sem hann hvatti fólk til að heimsækja Sádi-Arabíu.
Margir höfðu kallað eftir því að Messi færi ekki í þessa stöðu í ljósi mannréttindabrota í Sádi-Arabíu, þar á meðal fjölskylda eins fanga í landinu.
„Ef þú segir já við þessu þá ert þú að segja já við mannréttindabrotum," sagði í opnu bréfi mannréttindasamtakanna Grant Liberty sem var gefið út eftir að fréttir bárust af viðræðum Messi við Sádi-Arabana.
Messi er alls ekki eini íþróttamaðurinn sem hefur verið með tengingar við Sádi-Arabíu en David Beckham var gagnrýndur fyrir það að taka þátt í sýningarleik í landinu 2019.
Athugasemdir