Bruno Lage, stjóri Wolves, er með Covid-19 og aðstoðarmaður hans, Carlos Cachada, sat því fyrir svörum á fréttamannafundi í dag.

„Bruno greindist með veiruna en er ekki með nein einkenni. Í lok dagsins mun hann fara í aðra skimun og mun vonandi vera neikvæður svo hann geti stýrt í leiknum á morgun. Ef hann greinist jákvæður fer hann í aðra skimun á morgun," segir Cachada.

„Hann er í beinu sambandi við okkur allan daginn í gegnum tæknina. Hann var á æfingasvæðinu og horfði á síðasta leik í sjónvarpinu en var í beinu sambandi og það virkaði vel. Hann tók allar ákvarðanir um skiptingar og annað. Fyrir leikinn þá talaði hann við liðið gegnum Zoom og fór yfir hvað hann vildi með glærusýningu. Það sama var gert í hálfleik."

„Manchester City er með toppþjálfara, topplið, toppleikmenn. Þeir eru virkilega góðir í öllum þáttum leiksins en við gerum okkar besta til að trufla þá. Okkar markmið er að vinna Man City. Það verður erfitt en strákarnir trúa á sigur. Þeir hafa sýnt karakter þegar á þarf að halda."