Sveindís hefur verið í stóru hlutverki með liðið Wolfsburg sem varð Þýskalandsmeistari um helgina. Liðið fór alla leið í undanúrslit Meistaradeildarinnar.

Sveindís byrjaði að spila með Wolfsburg í janúar eftir að hafa verið á láni hjá Kristianstads í Svíþjóð. Upphaflegur samningur Sveindísar sem hún gerði í desember 2020 var til ársins 2024 en hún hefur nú skrifað undir til ársins 2025.

Á heimasíðu Wolfsburg segir Sveindís að umhverfið hjá liðinu sé fullkomið til þess að þróast áfram sem leikmaður á næstu árum.

„Þegar horft er til þess að Sveindís hefur ekki spilað í einhverri af toppdeildunum áður þá hefur þróun hennar undanfarnar vikur og mánuði verið mögnuð. Henni líður vel á hæsta stigi, Meitaradeildinni. Það má ekki gleyma að hún er bara 20 ára og það er enn frekari pláss fyrir bætingu. Því erum við hæstánægð með að framlengja við Sveindísi," segir Ralf Kellermann, íþróttastjóri Wolfsburg.