Brenna Lovera gerði þrennu er Selfoss vann Þór/KA, 4-1, í 8-liða úrslitum Mjólkurbikars kvenna á JÁVERK-vellinum á Selfossi í dag.

Það var mark Margrétar Árnadóttur sem skildi liðin að í hálfleik og Þór/KA með verðskuldaða forystu.

Hálfleiksræðan í klefa Selfyssinga virðist hafa virkað fullkomlega því liðið mætti inn í síðari hálfleikinn og gerði fjögur mörk.

Brenna jafnaði metin á 50. mínútu og var nálægt því að koma liðinu svo yfir þrettán mínútum síðar en skot hennar fór yfir úr dauðafæri.

Hún bætti upp fyrir það á 72. mínútu. Hún fékk boltann í teignum eftir fyrirgjöf frá hægri, tók snúninginn og kom Selfyssingum yifr.

Barbára Sól Gísladóttir bætti við forystuna á 84. mínútu með glæsilegu skoti í þaknetið áður en Brenna gerði þriðja og síðasta mark sitt í leiknum tveimur mínútum síðar er hún komst ein gegn Söru Mjöll Jóhannsdóttur og lagði boltann í netið. Önnur þrenna kvöldsins í Mjólkurbikarnum en Jasmín Erla Ingadóttir gerði einmitt þrjú mörk í 4-1 sigri Stjörnunnar á ÍBV fyrr í kvöld.

Lokatölur 4-1 fyrir Selfoss sem er komið í undanúrslit bikarsins ásamt Stjörnunni.