Þessi 22 ára gamli hægri bakvörður spilaði feykivel með Forest Green í D-deildinni á síðasta tímabili er liðið tryggði sig upp í C-deildina.

Hann var valinn í lið tímabilsins og var áhuginn mikill eftir tímabilið en hann ákvað að ganga í raðir Bristol City.

Félagið kynnti hann svo í dag með því að sýna hann sparka í blakbolta en það væri ekki frásögum færandi nema fyrir þær sakir að það er rautt handarfar á boltanum og vísar þar í myndina Cast Away með Tom Hanks.

Hanks lifir af flugslys og endar á eyðieyju í myndinni en hann myndar þar sterk tengsl við blakbolta frá bandaríska íþróttaframleiðandanum Wilson. Leiðir þeirra skiljast á mjög svo sorglegan hátt undir lok myndarinnar og þurfti Bristol City auðvitað að rífa upp gömul sár í kynningunni.