U21 árs landslið Írlands vann 3-1 sigur á Svíum í riðli 1 í undankeppni Evrópumótsins í dag en liðið gekk eftir Svía á síðustu tuttugu mínútum leiksins.

Mattias Svanberg, leikmaður Bologna, kom Svíum yfir á 19. mínútu en undir lok leiksins gáfu Írar í.

Jonathan Afolabi jafnaði metin á 69. mínútu og þá gerði Conor Masterson, fyrrum leikmaður Liverpool, annað markið á 87. mínútu áður en Tottenham-maðurinn, Troy Parrott, gulltryggði sigurinn í uppbótartíma.

Írland með fullt hús stiga í riðli 1 en Íslenska liðið leikur í sama riðli og hefur unnið báða leiki sína til þessa. Írland hefur unnið fyrstu þrjá leikina.

Ítalía leikur einnig í sama riðli en liðið vann Lúxemborg 5-0. Manuel Locatelli, Moise Kean, Riccardo Sottil, Marco Tumminello og Gianluca Scamacca gerðu mörkin. Þetta var fyrsti leikur Ítalíu í riðlinum.

Kean, sem leikur með Everton, átti upphaflega að spila með A-landsliði Ítalíu en hann og Nicolo Zaniolo, leikmaður Roma, brutu reglur landsliðsins en þeir mættu of seint á liðsfund og höfðu ítrekað brotið aðrar reglur sem gilda í hópnum og voru því sendir í U21 árs liðið.