„Við áttum tvo góða leiki síðast og ætlum að byggja ofan á það og taka tvo sigra," sagði Samúel Kári Friðjónsson sem mun líklega bera fyrirliðabandið með U21 árs landsliðinu gegn Norður Írlandi og Spáni á næstu dögum.
Leikirnir fara fram á Fylkisvelli í Árbænum, fyrst gegn Norður Írum á fimmtudaginn klukkan 16:45 og svo gegn Spánverjum á þriðjudaginn, líka 16:45.
„Við spiluðum á móti Norður Írlandi úti og það fór 1-1. Þetta er mjög fínt lið sem er að berjast um 2. sætið svo þeir koma vel stemmdir til leiks eins og við."
Albert Guðmundsson fyrirliði íslenska liðsins fékk kallið í A-landsliðið og því er búist við að Samúel Kári beri bandið.
„Vonandi," sagði hann spurður út í það. „Ef það er þannig þá geri ég það."
Samúel Kári var með A-landsliðinu á Heimsmeistaramótinu í Rússlandi í sumar en hefur ekki fengið traustið hjá Erik Hamren nýjum þjálfara Íslands og Frey Alexanderssyni aðstoðarmanni hans.
„Auðvitað er maður vonsvikinn að spila ekki fyrir A-landsliðið en það kennir mér að halda áfram og bæta mig. Núna er verkefni með U21 landsliðinu og ég næ að sýna mig þar," sagði hann.
„Það eru flottir leikmenn í A-landsliðinu núna og tími fyrir mig að komast inn aftur. Ég heyrði í Freysa fyrir síðustu ferð og hann fór nánar í afhverju ég er í U21 landsliðniu og ég er sammála því."
Athugasemdir