Ingólfur hefur undanfarin ár talað opinskátt um andleg vandamál í fótboltanum en slík vandamál settu stórt strik í reikningin á fótboltaferli hans.

Í haust hefur Ingólfur æft með ÍBV en hann segir í færslu á Twitter í dag að hann hafi nú ákveðið að hætta í fótbolta eftir að hafa dreymt um að komast að hjá liði í Pepsi-deildinni. Hann segir fortíðina vinna á móti sér.

„Undanfarið eina og hálfa árið hef ég lagt allt í sölurnar til að uppfylla draum minn um að spila fótbolta í efstu deild á Íslandi. Þann draum hef ég borið í brjósti mér frá því ég byrjaði að eltast við bolta hjá Val sem smápjakkur," sagði Ingólfur á Twitter í dag.

„Ég vakna upp á hverjum degi með þennan draum ljóslifandi í huga mér. Ég hef aldrei leyft mér að gefast upp, sama hversu fjarlægt markmiðið virðist vera. Hver einasti dagur er nýttur til þess að bæta sig, innan sem utan vallar, allt til þess að vera eins vel undirbúinn og kostur er, ef kallið skyldi koma."

„Ég hef beðið um tækifæri til að sýna mig og sanna, en alls staðar hef ég komið að lokuðum dyrum. Ég á mér vissulega mkla sögu sem ég er orðinn þreyttur á að endurtaka. Fortíðin virðist vinna gegn mér, frekar en með mér. Ég hef því ákveðið að hætta að spila fótbolta."

„Aldrei nokkurn tímann mun ég biðja um vorkunn - en ég vona innilega að næsti leikmaður, sem fær það verðuga verkefni að vera ekki eins og allir hinir, fái tækifæri og lið sjái það sem heillandi áskorun að ná því besta fram í honum."

pic.twitter.com/ztXbRPYZO5

— Ingólfur Sigurðsson (@ingolfursig) December 10, 2018