„Ég er ánægður að við skyldum skora undir lokin, við áttum það skilið," sagði Erik Hamren, landsliðsþjálfari Íslands, eftir 2-2 jafntefli gegn Svíþjóð í vináttulandsleik sem fram fór í Katar í dag.
Lestu um leikinn: Ísland 2 - 2 Svíþjóð
„Fyrri hálfleikurinn var mjög góður að okkar hálfu, við vörðumst vel og við hefðum átt að skora meira. Svíar voru betri í seinni hálfleik. Frá mínu sjónarhorni virtist seinna mark þeirra var rangstaða, en ég talaði við sænsku leikmennina og þeir sögðu að boltinn hefði komið af okkar leikmanni. Það var óheppni."
„Seinna mark okkar var gott. Ég er nokkuð sáttur með fyrsta leik okkar hérna."
Aðspurður að því hvort einhverjir leikmenn hefðu vakið sérstaka athygli þá nefni Hamren, Eið Aron Sigurbjörnsson, miðvörð Íslandsmeistara Vals.
Eiður var öflugur í vörninni en hann var að spila sinn fyrsta landsleik. Hann fékk skiptingu á 70 mínútu vegna þreytu en Eiður hefur ekki spilað mikið síðan í Pepsi-deildinni síðastliðið sumar.
„Já, Eiður Aron var mjög góður. Þú sérð að hann er að spila á Íslandi, hann var mjög þreyttur, en hann kom mér mjög á óvart. Vörnin var sterk heilt yfir og mörkin voru flott."
Hvernig var að mæta Svíum?
Hamren er auðvitað frá Svíþjóð og hann viðurkennir að það hafi verið sérstakt að mæta sinni heimaþjóð.
„Það var skrítið að heyra þjóðsönginn og vera ekki þarna meginn, en þetta var góð tilfinning."
Næsti leikur Íslands í Katar er gegn Eistlandi á þriðjudag. Það verða breytingar á liðinu fyrir þann leik.
„Við munum auðvitað gera breytingar, leikmennirnir eru ekki klárir í 90 mínútur þegar svona stutt er á milli leikja. Undirbúningstímabilið var að byrja. Við munum sjá til."
„Eistland vann í dag og það verður athyglisverð áskorun," sagði Hamren.
Viðtalið er í heild sinni hér að ofan.
Athugasemdir