Það vantaði ekki fjörið er Dalvík/Reynir mætti Tindastóli í síðasta leik Kjarnafæðismótsins í ár.

Liðin mættust í gærkvöldi og þurfti Dalvík/Reynir minnst fimm marka sigur til að hreppa toppsæti B-deildarinnar af sameinuðu liði Hattar og Hugins.

Leikurinn fór vel af stað og var Dalvík/Reynir búið að skora tvö mörk á fyrsta stundarfjórðunginum en þriðja markið virtist ekki ætla að láta sjá sig þegar fimm mínútur voru eftir af venjulegum leiktíma.

Það var þá sem Jóhann Daði Gíslason fékk beint rautt spjald í liði Tindastóls og lifnaði þá við Dalvíkingum sem skoruðu tvö mörk á tveimur mínútum. Þá vantaði allt í einu aðeins eitt mark til að vinna B-deildina og var blásið til stórsóknar.

Sú sókn endaði með fimmta markinu og rauðu spjaldi á Ísak Sigurjónsson, sem gerði einnig sjálfsmark fyrr í leiknum.

Dalvík/Reynir hreppti þannig toppsæti B-deildar og skildi Tindastól eftir í þriðja sæti.