| fim 11. febrúar 2021 11:00 |
|
Dótið hennar Selmu er enn í Napoli - Óvíst með sumarið
Af æfingu með Napoli
Selma var hjá Haukum árin 2018 og 2019
Skrifuðu undir á sama tíma hjá Napoli
Selma er án félags í dag og stefnir ekkert endilega á að spila í sumar. Fótbolti.net ræddi við hana í gær.
„Heyrðu það entist voða stutt út af covid og ég tók þá ákvörðun að taka mér hlé frá fótbolta sumarið eftir. Hef síðan verið að fá skilaboð frá liðum og ég beðin um að kíkja á æfingar við og við," sagði Selma þegar hún var spurð út í Napoli ævintýrið og hvað væri annars að frétta af sér.
Hvað endaði þetta á því að vera löng dvöl á Ítalíu?
„Þetta voru um fjórar vikur, tæpur mánuður. En dótið mitt er ennþá þar, ári seinna," sagði Selma.
Náðist að spila einhvern leik?
„Það var leikur daginn eftir að ég lenti og því var ég ekki með þar. Síðan for ég úr lið á fingri daginn fyrir einn leik og sem markmaður gat ég þá ekki tekið þátt. Og í þriðja leiknum vorum við mættar í rútu á völlinn að spila við lið í grennd við Mílanó en þurftum að snúa við því tekinn var ákvörðun að leikurinn færi ekki fram."
Þið voruð sem sagt mættar á völlinn en það var hætt við vegna smithættu?
„Já, við biðum í einn og hálfan tíma í rútunni við völlinn og svo var ákvörðunin staðfest."
Ég hefði kannski átt að spyrja þig að þessu strax í byrjun, hvernig kom Napoli upp á borðið til þín?
„Heyrðu það var nú bara óvænt. Ég hafði verið að æfa með Haukum á þessum tíma. Málið var að þeir hjá félaginu voru ekki að borga mér neitt og skulduðu mér alveg ár aftur í tímann. Ég ákvað að hætta að mæta á æfingar þangað til að ég myndi fá borgað."
„Samherji minn vissi af þessu og umboðsmaðurinn hennar sendi á hana á þessum tíma hvort hún vissi um einhvern markmann. Umboðsmaðurinn og þjálfari Napoli eru vinir og vissi að þar vantaði markvörð. Hún sendi mér einfaldlega línu einn daginn og hugsaði með sér að það væri fínt að ég færi þá bara þangað fyrst að Haukarnir væru ekki að borga mér."
Hvernig þróuðust málin varðandi upphæðina sem þú áttir inni hjá Haukum?
„Haukar í raun þurftu að borga mér áður en ég færi út þar sem ég þurfti að skrifa undir allskonar pappíra. Meðal annars pappíra um að ég væri kvitt við fyrri félög svo Haukar enduðu á að borga mér allt, allt gert í góðu."
Náðiru á þessum tíma úti að upplifa hvers lags stórveldi Napoli er?
„Já, ég náði því nefnilega alveg. En svo kannski vita það ekki alveg allir, það er þannig að Napoli kvenna og karla er í raun ekki sama félag. Napoli og Napoli Femminille er sitthvort félagið með sitthvort merkið. Þau spila ekki á sama leikvangi, eru með sitthvorn búninginn og sitthvorn forsetann."
Förum aftur heim til Íslands. Þú nefndir að einhver félög hafi verið í sambandi. Eru þetta lið í næstefstu deild?
„Þetta eru aðallega lið í 1. deildinni sem hafa verið í sambandi en einnig lið úr 2. deild."
Þú talaðir um að þú tókst þér hlé í fyrra. Upplifðiru, og gerir kannski enn, einhvern leiða gagnvart fótboltanum?
„Ég upplifi kannski ekki beint leiða en í fyrra sumar ákvað ég að taka mér samt pásu það sumar. Ég hafði ekki getað farið í fjölskyldufrí, ættarmót eða eitthvað álíka síðan ég var um tíu ára gömul vegna fótbolta svo ég ákvað að prófa eitt sumar að njóta, sem var mjög fínt."
„Lið höfðu verið að spyrja mig hvort ég væri til í að keppa bara leiki með þeim, án þess að vera æfa, en ég ákvað að það væri líka bindandi svo ég neitaði því."
„Eftir að hafa mætt á fyrstu æfinguna eftir langa pásu mundi ég hvað þetta er ótrúlega gaman, eftir næstu fann ég svo að þetta er svo gaman en það var líka svo gaman að geta gert eitthvað þegar ég vil."
„Upplifunin er sú að ég er ekki tilbúin að mæta á allar æfingar og alla leiki og fara 'all-in'. Ég elska samt ennþá að mæta á æfingar þegar mér langar."
Myndiru halda að það séu meiri líkur eða minni að þú spilir eitthvað næsta sumar?
„Ég myndi telja það minni líkur en meiri þar sem mér finnst miklu skemmtilegra að æfa bara þegar mig langar, en auðvitað eru fæst lið til í að hafa þannig leikmann," sagði Selma að lokum.
Napoli var á síðustu leiktíð í Serie B en komst upp um deild því liðið var efst í deildinni þegar henni var slaufað fyrir ellefu mánuðum síðan. Nú leika hjá félaginu þær Guðný Árnadóttir, á láni frá AC Milan og Lára Kristín Pedersen.
Hvað verður um dótið hennar Selmu í Napoli er óvíst en það blessast vonandi allt saman.
Athugasemdir
Nýjustu fréttirnar
