Boga er fyrrum leikmaður Chelsea, en hann spilaði aðeins einn leik fyrir aðalliðið þar áður en hann var seldur til Sassuolo árið 2018. Á tíma sínum hjá Chelsea gat hann fylgst með Hazard sýna mikil gæði, en Hazard var síðasta sumar seldur til Spánar eftir sjö ár í herbúðum Chelsea.

Hazard er goðsögn hjá Chelsea og Boga telur sig geta orðið jafngóður og Belginn.

Í viðtali við DAZN sagði Boga: „Hazard er klárlega sterkari en ég, en ekki í huga mínum. Ég veit hversu góður ég er og ég tel að ég geti orðið jafngóður og hann."

„Ég horfi á mörg myndbönd af Messi, Ben Arfa og Hazard. Núna horfi ég líka mikið á Neymar, en ég horfi alltaf á fyrstu þrjá."

Það er athyglisvert að hann horfi mikið á Ben Arfa. Ekki vantar hæfileikana hjá þeim leikmanni, en hann hefur kannski ekki alltaf náð að sýna þá. Ben Arfa er í dag 33 ára og leikmaður Valladolid á Spáni.

Boga, sem er 23 ára, hefur staðið sig vel á Ítalíu og fram kom í slúðri gærdagsins að Chelsea væri að hugsa um að kaupa hann aftur til félagsins.