Liðin mætast í útsláttarkeppni Evrópudeildarinnar eftir að gríska stórveldið sló Arsenal úr leik í síðustu umferð, á meðan Úlfarnir höfðu betur gegn Espanyol.

Wolves sendi beiðni til UEFA um að fresta leiknum gegn Olympiakos vegna kóróna veirunnar. UEFA hafnaði þeirri beiðni og er stjórn Úlfanna ekki sátt með ákvörðunina.

„Við teljum að þessi ferð setji leikmenn okkar, starfsfólk og fjölskyldur þeirra í óþarfa hættu á þessum erfiðu tímum. Við höfum einnig áhyggjur af andstæðingum okkar sem þurfa að spila undir erfiðum kringumstæðum, þar sem forseti félagsins er sýktur af veirunni," segir í yfirlýsingu Úlfanna sem var birt í gær.

„Við teljum suma hluti vera mikilvægari en knattspyrnu, heilbrigði starfsfólks okkar og almennings er einn af þessum hlutum. Þrátt fyrir þetta virðum við ákvörðun UEFA og heillindi keppninnar og munum því ferðast til Grikklands og spila þennan leik.

„Við vonum að UEFA muni íhuga aðrar lausnir fyrir næstu leiki, þar sem þetta verður ekki síðasti Evrópuleikurinn sem kóróna veiran mun hafa áhrif á."