Freyr fer brosandi á koddan í kvöld
„Þetta er flott fótboltalið með marga góða leikmenn sem eru að þroskast mjög hratt. Þetta var drulluerfitt en við kláruðum þetta með fagmennsku og gerðum það sem þurfti til og erum í toppsætinu," sagði Freyr Alexandersson, landsliðsþjálfari hás eftir öll öskrin af hliðarlínunni í kvöld.
Lestu um leikinn: Ísland 2 - 0 Slóvenía
Varnarmaðurinn Glódís Perla Viggósdóttir skoraði bæði mörk Íslands í kvöld og tryggði sigurinn. Það er ekki oft sem hafsent skorar tvö mörk. „Hún gerði vel, hún fær sér bara ís og verðlaunar sjálfa sig."
Freyr gerði tvær breytingar í upphafi síðari hálfleiks sem virtust breyta flæðinu í leiknum þegar að Elín Metta og Sígríður Lára komu inn.
„Við vorum búin að ákveða þessar skiptingar fyrir leik að þær myndu koma inn á. En við vissum að við vildum enda leikinn með ekki slakara lið heldur en við myndum byrja á."
Stemminginn í kvöld var vægast sagt mögnuð og hefur undirritaður sjaldan séð jafn góða stemmingu á kvennaleik. Freyr var að sjálfsögðu ánægður og vill minna fólk á að 1. september er rauður dagur en þá mætum við einmitt Þýskalandi á Laugardalsvelli.
„Geðveikt! Tólfan á allt hrós í heiminum skilið og allt fólkið sem kom. Ég vissi ekkert hvað myndu mæta margir og þetta var mjög óþægilegt þannig séð. Geggjuð stemming, Tólfan bestir í heimi. Það er bara taka daginn frá þetta er rauður dagur í dagatalinu. Við erum að fara fylla þetta hérna, við eigum séns, við höfum unnið þær áður."
Athugasemdir
