Sævar Atli Magnússon skoraði í 5-0 sigri U21 árs landsliðsins á Kýpur í kvöld er liðið kom sér í umspil fyrir Evrópumótið en hann gæti fengið afar lítið frí til að safna orku.
Lestu um leikinn: Ísland U21 5 - 0 Kýpur U21
Þessi ungi og efnilegi leikmaður fór með Lyngby upp í dönsku úrvalsdeildina fyrir tveimur vikum síðan eftir afar erfitt tímabil og hoppaði hann beint í verkefni með U21 árs landsliðinu.
Liðið spilaði þrjá leiki, allt leikir sem þurftu að vinnast. Það hafðist og kom liðið sér í umspil.
Danska úrvalsdeildin fer af stað 17. júlí og ekki langt í undirbúningstímabil en Sævar segir það koma betur í ljós á næstu dögum hvort hann fái eitthvað frí.
„Góð spurning. Ég heyri í Freysa örugglega á morgun með þetta en það verður að koma í ljós. Við erum að fara í svo spennandi verkefni með Lyngby að spila í Superligunni sem er gjörsamlega frábær deild."
„Ég er þreyttur í dag en kannski verð ég ferskur á morgun og spenntur. Ég er klárlega spenntur að fara aftur út en það verður að koma í ljós með fríið," sagði Sævar við Fótbolta.net.
Athugasemdir